راح فيها الملك
ــــــــــــــــــــــ
إنــت اللي تـبّـعـك مهبــول..........واللي صـدَّقــك تـنـبال
وهـاو صرت مـش مقـبول..........مـن أكبار والا إعـيـال
أنت فكرك صـبـح معــلول..........ما إتعـالجـه الأمصــال
ــــــــــــــــــ
أنا أنـقولــــــــــــك..........إنــك إنســان عـنـيــــد
ومن يـــوم جيــــت..........أنت ومـسـكت الإيــــد
وقعمزت عالكرسي
ونـصّبـت روحك سيـد
وخدعتنا بـكلامك المعسول..........وياما قلـت أقـــــــــوال
وأطْلع كذب مش معـقــول..........ومعاه ضاعـت الآمـال
ـــــــــــــــــــ
أنا أنقـولّــــــــــــك..........أنت شخـص ثعبــــان
أنت عدو لـيـنــــــا..........شـرَّدتنا إف لـوطـان
كنت تريد تمحـانــا
وتبي أدُّول في المكان
وللعـالـم إتْـريد تقــــــــــول..........أنك بطـل من لبطــال
وأنت مالكــشي أوصــــول..........ماكْ م العرب موحـال
ـــــــــــــــــــــ
أنــا أنـقــولّـــــــــك..........زمان قـالها تـرّاس
اللي صدقوه أكـثــار..........من بغداد لمكنــــاس
هو ماهوغريب عليك
لكن أنت قلت سـيّـاس
ووصـفت نـاسه أعـجــــول..........الشاعرأغبر في الحال
ولحـقـته بعد كـم حــــــــول..........ومعاك هلبـــه أنــذال
ــــــــــــــــــــــ
أنـــا أنــقــولـــــــك..........أنت وقــت نصحوك
رفعت الخشم ليفـوق..........ولكلامات ما عجبوك
وما تبي نصيحة حــد
وتامرهم تبي يحبوك
وأنت كمــا المـسـطـــــــــول..........وخلاص مخك سـال
متناقض في كل القــــــــــول..........ناهيك عن لفـعــــــال
ــــــــــــــــــــــــ
أنـا أنـقـولّـــــــــــك..........هاك رحت فيـها اليوم
وفيه القبر مـا زال..........عـندك شـقاء وهْمــوم
إللي درت موش أشوي
وما عـاد ينفع ســوم
في اللي مات والمـقـتـــــول..........في تشاد وبحـرْ غزال
وفي بوسـليم والمـجهـــــول..........واللي ما عليـه أسـوال
ــــــــــــــــــــــــــ
أنـا أنـقــولّــــــــــــك..........أنا كّرهت حتّى سْماك
من يــوم زايـد مات..........وأفكاره خذيت معــاك
ونخلها حجاره أشهود
وهبّلْتــه بحبوب دواك
وقـعد وسط سبهـا إيـجـــول..........ومحـمد ولــد رجّــال
وما عمره طــلع معـجـــول..........لـما يصــير إنــــــزال
ـــــــــــــــــــــــــ
أنـــا أنـقــولّـــــــــك..........ما حــد فـيهــا قـعـــد
وفي ها الدنـيـا عاش..........ومنـهو اللي خــلّـد
وين ناس كانوا زمــان
النمـرود ودات عمــــد
والا خذيت العـهد تبقى طول..........ومن منــو يـا دجــّـال
يا مشرك بْألله وناكر الرسول..........وأحبابك جنون أرزال
ـــــــــــــــــــــــ
أنــا أنـقــولّــــــــــك..........ما ينـفـعـك شاكـــير
لا إكعــيم ولا بوزيد..........لا ظابط ولا مـودير
الكـل صاروا فْمعسره
كـل واحـد يـريد يطير
بعد الظكر فيها صدع بالقول..........وقال لا إيســــدْ إذلال
وتحـركوا لولاد ها الفحــول..........وقامت وصــار إقْتالْ
ــــــــــــــــــــــــــ
أنــا أنـقـولّــــــــــــك..........قامت الثوره خلاص
إفْسبعطاش من فورار..........وصارالفداء بالراس
من الناس عدى الخوف
والثوار خلقوا حمــاس
واللي يريد حرّيه ولّى يقــول..........يا الله ناصر البطّــــال
الله أكبر يا وجـه لقــبـــــــول..........يا شَهيد أرض الخـــال
ـــــــــــــــــــــــــ
أنا أنـقـــولّــــــــــــــك..........راحت خلاص عليك
ولو كان تهــرب خـير..........بأولادك مع أمالـيـك
أنت حكمك بدى ينهار
يوم ما رفـعت بإيديك
حطّيت رجلك في وجْهنا طول..........وأنا سيدكم يا حُتـــال
أنتـم بلايا مـا تساووا فــــول..........إكلاب درته لرجــال
ـــــــــــــــــــــــ
أنا أنــقولّــــــــــــــك..........شوف كيف أنت صرت
كمـا الفار متـخّــــبي..........في حـفـره إفـ ســــرت
جبدوك أهــل أجهـاد
وعلى كل هاللي درت
حكموك وما خلوك حتى تقول..........وأصبحت تحت أنعـال
اللي ظلمتهم مانك بْهم مشغول..........ملك السود والبنغال
ــــــــــــــــــــــــ
منـقــول ....مــن ؟؟؟؟؟
ــــــــــــــــــــــــــ
30 ـ 12 ـ 2011