حكـمة الصبر
ــــــــــــــــــ
إن الصـبر من الحكـم العظيمـة التي يجب أن يتحلى بها الإنسان ،
فبالصر يمكن للإنسان الوصول الى غايته ويستطيع تحقـيق طموحاته
وبه أيضا يمكن أن يوفرعلى نفسه مثاعب كثيرة ، وبالصـبر يمكنه
نسيان المآسي وتحمل مشاق الحياة ..
إن الصبردائما يوصل الى سبيل الخلاص والنجاة، وبه يمكن أن يتفادى
الإنسان الوقوع في الخـطأ .. وتقول واحدة من الروايات الكثيرة حوله :
كان فيه راجـل تاجر ـ هو ديمه إيتاجر ـ يعني يمشي للتجاره ..
وفيه مـره ..زي عادته مشى للتـجارة ولكـن قال في خاطره أنا المرة
هذه نبي إنجيب إتجارة ما أهناش كيفهـا في السوق ..
المـهم الراجل هاذا عـنده أولـيد أوحـيد .. ومرته .
خبرمرته قبـل ما إيسافـر إنه المخطر هذا أراهويبي إيـعـطل أشويه..
وهي لازم أتـرد بالها من الوـلد وما أتـخـليه يحــتاج وتعطيه كل ما
يبيه ، وخلالها مال ياما قبل ما إيسافـر ..
قول الراجل توكل على الله وسافر.. وقـعد إيدورفي التجارة من إبلاد
لبلاد .. إيجي خمس إسنـين.. ووصل لـوين.. زي ما أنقـولوا إبلاد
الهـند والا منهاغادي المهـم هاذاكه التاجـر قـعد إيدور وإيلـقط في
تجارته من كل مكان ..
وفي يوم من الأيام جاء لبـلاد ودخل السـوق ..
واذا بيه راجـل كـبير إيبان شيخ والا شنو .. هكي زي ما أنقـولوا
دايرهاذيكـه لعمامه ، ولابس هاكه اللبسـه البيضاء ، وهوإيدوروإيعيط
يا شاري..يا شاري ، ولكن هو ما شاد شيء فـيده .. وإينادي :
يا شاري إبعـشره إجنـيه .. الوحده إبعشره إجنيه .. يا شاري الوحده
إبعشره أجنيه بس .. يا شاري ، وينك يا شاري ..
أستغـرب سيك التاجـرفي الراجل ، وقال زعـمه شنو إيبيـع.. واللي
زادت خلاته يستغرب أكثر أن فيه من يلاقيه وإيـوقفه مره بعد مره ،
ويعـطيه في عشره إجـنيه .. يأخذها الشايب ، وما يعـطي شي للـراجل ..
الراجل التاجر صـبر .. صبر ، ولكن بعـدين قال ما فيهاش لازم نسأله ..
شنو زعـمه اللي إيبــيع فيه..
وشنو اللي هكي حقـه غالي ، والناس تشري فيه .
قول يا سيدي .. عدى التاجـر قـدى الشيخ وسلـم عليه .. وبعدين قاله :
شنو أتـبيع يا تراس .. فـرد عليـه الرجـل ..الصــبر ..
قال التاجـر : شنـو الصـبر !!!! . شنو الصـبر ..؟ . فـرد عليه الشيخ :
أيوه الصبر .. فقال التاجر : في نفـسه خلي بنشبح الصبر اللي إيبيع فيه
ها الراجـل كيف شكـله ..
خذا التاجـرعشـره أجنيه وأعطاها للشـيخ ..اللي خذاها ، وقال: الصبر.
الصبر.. الصـبر .. ثلاث مـرات ، وقال هـيا السلام عـليكم .. ومشى
والتاجر قعد حاير وهو إيقول : الصبر شنوالصبر.. أمن حكايه !!!!!
شنو الصبرهذا ثلاث كلمات صـبر بعشره أجتيه .. شيء غـريب والله ..
المعهم قال هيا : ما راحن غـير هاذوا .. أيعوض اللـه إنشاء اللـه ..
ودار التاجـر في السوق وخـذى أبضاعـته ..
والحاصل بعـد ما الـراجل التاجـر جـهـز روحـه وخـذى كل ما يبي من
أبضاعه خلاص قـرر إيـروح.. وبعـد كم يـوم قعـد إيمرعلى الناس اللي
شرى منها ويلمد في أتجارتـه .. ولمـا جمعهـا ..قول حطها على هاذوكه
البل وقال يا اللـه..
بره يا سيدي هاذي إبلاد..وهـاذيك أبلاد ..هاذي أبلاد وهاذيك أبلاد ..
لين أوصل.. ولكن وصلته لإبلادهـم جت في الليل ..
الليل أمــوخر أشوية ..
قال للأصحاب القافـلـه إيـنزلـوا لبضاعـه .. ماهو إمأجر قافله باش جاب
عليها أبضاعـته ..أأأأأ... أماله . تاجر كبير ..
وقول يا سيدي الراجـل يقــول هكي إيروح لحوشه .. وفي الليل قال :
توه هـم راقـدين ماني أمـنوضهم .. قول فتح الباب بالشويه وخـش ..
وما طاقاش الصبر وقال :
خلي أنشوف الولد.. وخش للدار أشوي يلقى مرته راقـد بحداها راجل
متغطي .. جبد سيفه ورفعه بيـضربه .. وتوعد عليه .. وبعدين قال ..
عـلاش أنا مستعجل ..خلي توه .. الصبح نتأكد من الأمر وبعدين ساهل
مشى خذى فـراش فـرشه وأرقـد بـره .. وشنو يا ودي ما جاه نوم ..
مـنين أيجيه النـوم ومرته راقـد أمعاها راجـل.. وقعد إبليس ياخذ وإيجيب
فـيه ،
ولكن عـقـله إيقـوله أصـبر شنو ما زال على الصبح ..
وقـول جاء الصبح وناضت المـرا .. وهي طالعـه من الدارألقـت راجلها .
فــزغـرتت .. وأستاقـض الـراجـل اللي كان راقـد بحداها ..
وهي أتنوض فـيه وأتقـوله : نـوض أبوك جاء أبـوك جاء ..
فشبحلها التاجر مستغرب ..
قالت له إيه هذا ولـدنا .. شني يا باب أمال أنت سافــرت اليـوم ..
وأضبطـهــم .. ولـده ومـرته وقـعـد يبـكي ..
ولمـا فاق قالت له خـيرك .. تبكي .. وأنت شنو اللي أتـمـتـم بيه ..
قال إلها ..الصـبر .. الصـبر .. الصـبر ..
كلمـه شريتها بعشره أجنيه وأستغـليتها .. وهزيت عليها ..
وشوفي حكمة اللـه ، لولاها أراني قتلت ولـدي ..
وهذا وين أعـرفت أنه في((الصـبر حكـمة)) .. زي ما إيقـولـوا ..
منـير تاج الدين منير
ــــــــــــــــــــــــــــ
السيلاوي//الغريفة