الموضوع منقول عن الفيس بوك
كاتبــــه الأستاذ:
محمد عاطف
إشترك · 5 يوليو
انا الدرويش
انا الهايم ما بين الخلق في الملكوت
انا اللي صرخت جوايا بعلو الصوت
و قلت يا دنيا مش عايز
هعيش خسران .. و انا الفايز
و مش هسأل طريقي منين
هعيش بين الدروب طواف
يقولوا اعمى و انا الشواف
و مين قال البصر بالعين
دا انا اللي كنت وسطيكم بعيد عنكم
انا اللي كنت يوم منكم و مش منكم
و قالوا الزهد للعارفين
كلام مجانين
منيش زاهد لكن رافض
و نفسي اني اكون نفسي
و نفسي في حلم ساعة البرد
بيدفي
و ياخد ايدي لدنيا غير الدنيا
وشوش تانيه
لا تعرف حقد ولا غيره
ولا مره تلوم الحلم
ولا تعامله بتسعيره
لدنيا ارسمها بكفوفي
تطمن جوايا خوفي
لضحكه بجد مش عيره
و هرسم فيها حبيبي اللي مشفتوش
و هعيش فرح لسه ف عمري معشتوش
ولآجل ما الاقي احلامي انا راحل
لكن طالب و طلبي بسيط
طلبي عبيط
لا انا طالب عيون تبكي و دمع يسيل
ولا طالب الاقي ما بينكوا للعتمه في طريقي دليل
انا طالب في يوم ما اغيب بعيد عنكم
و اكون ذكرى و تيجي في مره على بالكم
تقولوا دا كان ما بينا زمان
هنا واحد و كان درويش
لكن ... انسان
درويش
محمد عاطف
اليومية
